Tamin’ny 29 oktobra 2025, nandritra ny fananganana ny governemanta voalohany, Michaël Randrianirina dia nanao kabary mazava sy hentitra ho an’ireo minisitra vaovao. Nohamafisiny fa tsy tompon’andraikitra amin’ny tenany ireo mpikambana ao amin’ny governemanta, fa mpanompon’ny vahoaka. Ny vahoaka no “mpampiasa” azy ireo, ka tokony hiasa ho amin’ny tombontsoan’ny firenena izy rehetra. Nampitandrina izy fa tsy ekena mihitsy ny fitondran-tena tsy mendrika na ny fivilian-dalana. Tokony ho modely sy fitaratra ho an’ny vahoaka ny mpitondra. Nolaviny tanteraka ihany koa ny kolikoly sy ny fomba rehetra mety hanimba ny fitokisan’ny vahoaka. Farany, niantso ny minisitra rehetra izy mba hiasa amin’ny fahazotoana sy fahamatorana, mba hahafahan’ny vahoaka mahatsapa marina ny fiovana sy ny fanavaozana eto Madagasikara.